Darmstadtium

Vörlaag:Infobox Element Darmstadtium is en cheemsch Element, dat blots künstlich tüügt vörkummt. Dat Element, dat to de Transactinoiden tellt, hett dat Atomteken Ds un de Atomtall 110.

Historie

Opbo vun’t Experiment to’n Tügen vun de Elementen 107 bit 112

Dat Element Darmstadtium is to’n eersten mol an’n 9. November 1994 bi de Sellschop för Sworionenforschen (GSI) in Darmstadt herstellt worrn. De Versöök is vun Peter Armbruster un Gottfried Münzenberg ünner dat Regeer vun Sigurd Hofmann maakt worrn. Tüügt weer dat ne’e Element dör Fusion vun en Blie (²⁰⁸Pb)- un en Nickel-Ion (⁶²Ni) ünner Utsennen vun en Neutron:

${}_{82}^{208}\mathrm{P}\mathrm{b}+{}_{28}^{62}\mathrm{N}\mathrm{i}\to {}_{110}^{269}\mathrm{D}\mathrm{s}+{}_0^1\mathrm{n}$

In de Twüschentiet sünd veerteihn verschedene Isotopen vun Darmstadtium tüügt worrn, de Atomtallen twüschen 267 un 282 opwiest. Jemehr Halfweertstieten leegt twüschen 3,1 µs (²⁶⁷Ds) un 1,1 min(²⁸²Ds).

Naam

Dat Element is toeerst ünner den vörlöpigen Naam Ununnilium (Atomteken Uun) bekannt worrn, wat de latiensche Beteken för de Atomtall 110 is. Bito is ok de Naam Eka-Platin bruukt worrn, vunwegen dat dat Element in’t Periodensystem ünner dat Platin to stahn kummt. De Naam Darmstadtium is an’n 15. August 2003 vun de IUPAC annahmen worrn. Dormit weer de Sellschop ehrt, woneem blangen Darmstadtium noch fief wietere Elementen opdeckt worrn sünd. Offiziell is dat Element siet den 2. Dezember 2003 ünner sien hüütigen Naam bekannt.

Literatur

• Name and symbol of element of atomic number 110 (PDF; 113 kB), Pure Appl. Chem. 75 (10), S. 1613–1615, 2003 (DOI: 10.1351/pac200375101613).

Weblenken

Vörlaag:Navigatschoonsliest Periodensystem