Blieazid

Vörlaag:Infobox cheemsch Stoff Blieazid is dat Bliesolt vun de Stickstoffwaterstoffsüür. De Stoff is explosionsgefährlich un warrt as Initialsprengstoff bruukt.

Bruuk

Siet sien eerst Verwennen as Initialsprengstoff (Wöhler-Martin) is Blieazid to’n wichtigsten Sprengstoff in dissen Bruuk worrn, de dat Knallquecksülver, dat fröher begäng weer, meist vullstännig verdrängt hett. Dat hett woll en lüttere Dicht un’n sieteren Energieinholt, aver liekers en gröttere Initialkraft und is butendem weniger fienföhlig gegen Slääg un Stöten as Knallquecksülver. Bito is dat bestänniger bi högere Temperaturen un Fuchtigkeit. Dat Aluminium to’n Herstellen vun Sprengkapseln bruukt warrn künn, wat de Produkschoon düütlich billiger maken de, güng blots mit’n Bruuk vun Blieazid, vun wegen dat dat Knallquecksülver (Quecksülver(II)-fulminat) mit Aluminium Amalgam billt.

Stoffegenschoppen

• Explosionssnelligkeit: 4630 m/s
• Verpuffungspunkt: 340 °C/10S
• Verbrennwarms: 630 cal/g
• Explosionswarms: 367/g
• Slagfienföhligkeit na Koenen: 0,4 kg·m
• Gewichtsverlust na 2 Daag bi 100 °C: 0,05 %
• Fuchtigkeitsopnahm bi 30 °C un 90 % rel. Luftfuchtigkeit: 0,84 %

Herstellen

Bliazid kummt dör dubbelt Ümsetten vun waterlösliche Bliesolten mit Solten vun de Stickstoffwaterstoffsüür tostannen. Dör Ännern vun de Bedingen, ünner de dat herstellt warrt, also to’n Bispeel de Temperatur, de Kunzentration vun de Lösen un de Oort vun’t Bliesolt, künnt Produkten mit kolloidale Strukturbit hen to regelmatig utbillte Kristallen tüügt warrn. De Kristalldracht warrt noch dör wietere Tosätz (t. B. Dextrin oder Polyvinylalkohol) ünnerstütt, de dat Wassdom vun de Kristallen in sünnere Richt schuven doot.

Dorbi müch een jüst de Blieazid-Form herstellen, de ehr Opgaav ünner mööglichst siete Gefohr deit, de mit’n Bruuk vun so fienföhlige Sprengstoffen verbunnen sünd. Wo groot de Gefohr is, wiest sik dorin, dat Azid sik in hitt Water oplöst un bi’t Afköhlen lange dörsichtige Kristallen billt, de al bi’t Tweibreken ünner Water tünnert. Ut den Grund warrt in de praktische Anwennen keen rein Blieazid bruukt. Man stellt Produkten her, de as „Verdünnmiddels“ basische oder annere sworlösliche Bliesolten bargt. Dat technische Blieazid, dat an’n fakensten bruukt warrt, bargt 87 % Blieazid, ruchweg 5 % Dextrin un üm un bi 8 % Bliehydroxid.

De Metallstoff (Blie), de bi de Explosion tostannen kummt, is giftig. Bi’t Tünnern blots to’n Wiesen, as in Vörlesungsversöken, ist dat beter, Sülverazid to wiesen. En Vördeel vun Sülverazid is wieterhen, dat dat jümmer in fienste Kristallen entsteiht, vun wegen dat dat ok in hitt Water slecht to lösen geiht. Dördor reduzeert sik de Gefohr, wenn een dat in de Hannen hett.